Linea di confine

Bemmenute dint’ô primmo puosto napulitano ’e tutt’ ’a rezza! L’avimmo fravecato pe ffà canoscere ’a Campania e ’a lengua soia a cchi ce campa e ce fatica. Sì, è overo, ce ne stà quaccherun’ato, ma nun se capisce nquala lengua ll’hanno scritte, po songo quase tutte quante chine ’e vacantarìa e, pe cchiurere, ’un so’ bbelle comm’ô nuosto. Nuie ausammo n’ortografia sturiata apposta p’ ’o nnapulitano ca se parla a Nnapule int’ê mmure. ’O puosto è addedecato però a ttutt’ ’e ggente r’ ’a Campania e vvò rà spazzio a ogne parlata ca r’ ’o nnapulitano è pparente astretta. Ce nnirizzammo pure a llinguiste ca tenessero ’a dicere quaccosa, a ffurastiere che ne vonno sapé nu poco ’e cchiù, e a ttutte ’e guagliune nuoste ca se so’ viste ’e scippà ’a lengua ’e ll’antenate lloro e ’a ntenneno assapé pe s’ ’a piglià pe mmamma.
Tenimmo parecchie idee e nu bbuono prugramma e abbiate ca sarranno pubbrecate int’a sti ppaggene pe deffonnere e ffà canoscere ’a lengua napulitana, ’a cultura soia e ogne prubblema ca se porta appriesso. Ate ne chierimmo a cchi vò rà na mano, faticanno nzieme a nnuie, mannannoce ammasciate, articule, preposte. Ce serve ncopp’a ttutto ’o seccurzo r’ ’e patute ’e fore Napule e de chi sape bbuono ’e pparlate e ’a cultura r’ ’e gruosse paise piccerille r’ ’e ppruvince, r’ ’o Celiento, r’ ’o Sannio e dde ll’Irpinia. Chi trase e llegge int’a stu puosto truvarrà sicuramente nu campo propeto ’e nteresse e si stà ’e ggenio ce mannasse senz’attrasso ’o nniro c’ha miso ncopp’ô gghianco. ’A redazzione valutarrà spunzabbelmente ’a pussibbeletà ’e pubbrecazzione int’a n’apposeta rubbrica.

Per coloro che avessero bisogno della traduzione dalla lingua napoletana alla lingua italiana... rivolgersi... al sito!

Sito web: http://www.ilc.it/puosto.htm